الولد لما يرجع من الفرح ....

والدته :- اخبار الفرح ايه يابنى تعالى احكيلى ؟؟

الولد :- كويس ...

- أيوه كويس ازاى يعنى ؟؟
العروسة عاملة ازاى ؟؟
العريس .. البوفيه كان ايه ؟؟

- كله كويس ....

.........................................

البنت لما بترجع من الفرح ....

والدتها :- أخبار الفرح ايه تعالى احكيلى ؟؟

البنت :- بصى ... احنا أول ما وصلنا كان فيه مشكلة فى الدخول للبوابة وكان فيه زحمة أوى ..
وأنا مستنية شفت علياء بنت خالة سمير وجيهان وجوزها واولادها وسلمت عليهم ...
جيهان كانت لابسة فستان يجنن .. .بس كان ضيق أوى !!
أنا ماعرفش جوزها وافق انها تلبسه ازاى ؟؟ ...
كان لونه موف غامق وعليه جزمة فضى والشنطة كمان فضى ..
والطرحة كان لونها فضى فكان شكلها جميل أوى ...
قعدت ترغى معايا وقالتلى أن العيال جننوها عشان تلبسهم وهم جايين ..
أنا سألتها شارية الفستان منين قالتلى من مدينة نصر شارع عباس العقاد ...
المهم اتكلمنا شوية وعلى ما الزحمة فكت دخلنا ...
والحمدلله بعد ما دخلنا بخمس دقايق بدأت الزفة ...
أكتر حاجة تضحك بقى ... ان ميريهان حبيبة العريس الأولانية وخطيبته السايقة كانت موجودة ...
وكانت لابسة فستان عريان وحاطة مكياج فاقع زى ماتكون عايزه تغيظه وتغيظ العروسة ...
وبصراحة كان باين عليها أنها حتطق من الغيظ ...
الزفة ماكانتش حلوة !! وفضلنا ييجى ساعة واقفين ..
صحيح الفرقة عملت كذا استعراض بلدى وخليجى ولاتينى ...
بس مش عارفة ماعجبتنيش ...
وأنا واقفة بصيت لقيت مين بيسلم عليا ؟؟
أونكل حسين بابا لمياء !! وسألته فين لمياء ؟؟ قاللى أنها دخلت جوه القاعة ....

العروسة فستانها كان بلدى بصراحة .. .ايه اللى هى لابساه ده !!
والمكياج كان وحش ... العريس كان زى القمر ... خسارة فيها !!
والبدلة بتاعته كانت حلوة أوى ... كان لابس بدلة كحلى مش أسود تخيلى ؟؟ ...
وكان لابس بابيون بدل الكرافته كانت تجنن وبتلمع ومالهاش حل ....


بصى ... أنا حروح أغير هدومى وآجى أحكيلك بالتفصيل ...

هههههههههههه
لسة فيها تفاصيل ..!!!